მიზეზები, მიზნები და როგორ გავხდი 30 წლის

ეს ბლოგი როცა გავხსენი 2008 წელს, რას ვიფიქრებდი, რომ 30 წელს მივაღწევდი და ისევ დავწერდი. რას წარმოვიდგენდი, რომ ჩემს აზროვნებაში ბევრი რამე რადიკალურად შეიცვლებოდა.
ვერც იმას დავიჯერებდი, რომ ოდესმე ცომს მოვზელდი და პურს გამოვაცხობდი.
ან კიდევ ერთ დღეში გავაკეთებდი სადილს ოჯახისთვის, პატარა ბავშვებისთვის, გამოვაცხობდი სახანუკო სუფგანიებს, დავალაგებდი და ამ დროს ვიცეკვებდი კიდეც.
ა, ხო, შუალედებში ტუშს წავისვამდი და საყურეების გაკეთებაც არ დამავიწყდებოდა, იმიტომ რომ ჩემი ქმარი, შვილები და ადამიანები, ვისაც ჩემი დანახვა უნდა და უხარია, იმსახურებენ, ლამაზს და მხიარულს მხედავდნენ.

ყველა ადამიანი იმსახურებს სხვებს მხიარულს ხედავდეს, რადგან როცა სხვას ხედავს ბედნიერს, შენც გედება მისი აურა და კმაყოფილი ხდები. ზუსტად ისე, როგორც "მიმინოშია", ხომ გახსოვთ? :-)

ასე, 30 წლისაც გავხდი და გადავედი სხვა თაობაში, ასაკში, რაც გინდა დაარქვით.
It's CRAZY!!!

მადლობა ღმ-ერთს ყველაფრისათვის!!!
დედაჩემს, რომელმაც 35 წლის ასაკში გამაჩინა და მომცა ყველაფერი, რაც ჰქონდა.
მადლობა ჩემს ქმარს და შვილებს, რომლებსაც ასე უყვართ თავისი bossy fussy Mama Sophie.
მადლობა ყველას, ვისაც ვიცნობ, ან არ ვიცნობ, მაგრამ მაინც ჰქონია ჩემზე გავლენა.

როგორც ჩემს ბოლო ლექციაში მქონდა საუბარი, აბსოლუტურად ყველა ადამიანი და ყველა მომენტი, რაც კი ჩვენს ცხოვრებაში ხდება, განსაკუთრებული მიზეზით ხდება, რადგან არ არსებობს შემთხვევითობა ცხოვრებაში. უბრალოდ, არ არსებობს!

დილით გაიღვიძე, ღილი აგიწყდა, გაუთოებულ ბოლოკაბაზე ყავა გადაისხი, ორივე ბავშვმა ერთდროულად გაიღვიძა, ერთად მოუნდათ ჭამა, დალევა, პირის დაბანა, ტუალეტში, ამ დროს შენ შეხვედრაზე გეჩქარება...
უცებ კარზე ზარის ხმა ისმის და შენი მეგობარი მოდის, რომელიც ადრე გამოუშვეს ლექციებიდან და გადაწყვიტა შემოევლო და შენი შვილები სასეირნოდ წაეყვანა.

არაფერი იყო შემთხვევით-მეთქი, გეუბნებით. საბოლოოდ, ყველაფერი პოზიტიურია, ნეგატიური შემთხვევებიც კი, რადგან მოაზროვნე ადამიანი ყოველთვის ისე შემოაბრუნებს მოვლენებს, რომ მისგან კარგი გაკვეთილი მიიღოს და მომავალში გამოიყენოს: სული დაიმშვიდოს და იცოდეს, რომ მარტო არ არის და არასოდეს იქნება.

არა, ეს რატომ ჩავურთე ჩემს სადაბადებისდღეო პოსტში, არ ვიცი :დ ჯუდი ებოტივით, ერთი წერა თუ დავიწყე, მერე კალამი თავისით დარბის ფურცელზეო, ზუსტად ისე არ ვარ? :-)

ბედნიერ დღესასწაულებს გისურვებთ - ჯანმრთელობას, სიხარულს, ბედნიერებასა და იმის დაჯერებას, რომ არაფერია შემთხვევითი ჩვენს ცხოვრებაში, ყველას და ყველაფერს აქვს თავისი მიზეზი და მიზანი.