მაკულატურა

დღეს ჩემი უჯრების და კარადების დალაგება გადავწყვიტე. გადმოვალაგე მთელი დღიურები, რვეულები, ოთხწლიანი უნივერსიტეტისდროინდელი "ქსეროქსები", რომლებსაც ისეთი რაოდენობით გვაღებინებდნენ, ყუთები მაქვს გატენილი. ამიტომ ვიფიქრე, იქნებ თბილისში სადმე მაკულატურას იბარებენ-მეთქი. მერე ვიღაცამ მითხრა, ეგ საბჭოთა პერიოდში ხდებოდაო. ვუყურებ ამდენ ქაღალდს და წარმომიდგენია, რამდენი ხეა მოჭრილი და განადგურებული მის გამო.


გერმანიაში, ბელგიაში არის სპეციალურად დახარისხებული სანაგვე ყუთები, სადაც ცალკე ყრი მინას, ქაღალდებს, საჭმლის ნარჩენებს და ღამე მშვიდად გძინავს, იცი, რომ ხე თუ მოჭრეს, მერე ამ ქაღალდებს გადაამუშავებენ და ახალ ფურცლებს გამოუშვებენ. ვიცი, ჩვენ ჯერ ამისგან ძალიან შორს ვართ და ქალაქში ნაგავსაყრელებიც კი არ არის ნორმალურად მოწესრიგებული და იქ საქონელს "აბალახებენ".
ამიტომ ჩემს ქაღალდებს ისევ ვინახავ იმ იმედით, რომ შეიძლება სადმე აღმოვაჩინო მაკულატურის ჩამბარებელი პუნქტი და ხეებზე აღარ ვიდარდო.


"გუგვლისას" ეს სურათი ვნახე და მომეწონა, მშვენიერი გამოგონებაა. იქნებ მეც ასეთი ნაგვის ყუთები გავაკეთო? მაგრამ ჩემი მაკულატურა თაბახის ფურცლებს შეადგენს, რომელთან ჭიდილისას, სავარაუდოდ, ხელებს დავიჭრი. მერე გადასაყრელი გახდება. ისე რომ, თუ ვინმემ იცით, სად შეიძლება მაკულატურის ჩაბარება ან იდეა გაქვთ, რა შეიძლება მოვუხერხოთ ქაღალდებს, მომწერეთ.